Cibearsheasmhacht ag EURid

Ag EURid, aithnímid an mhórthábhacht a bhaineann le cibearsheasmhacht láidir a choinneáil chun fearann barrleibhéil (TLD) .eu a chosaint. Mar an eagraíocht neamhbhrabúis atá ceaptha ag an gCoimisiún Eorpach chun TLD .eu a bhainistiú, táimid tiomanta na caighdeáin is airde maidir le slándáil agus ionracas oibríochta a chinntiú.

Deimhniú ISO/IEC 27001

Mar eintiteas riachtanach agus i gcomhréir le reachtaíocht NIS na Beilge, tá deimhniú ISO/IEC 27001 ag EURid. Léiríonn an deimhniú sin ár dtiomantas do chóras cuimsitheach bainistíochta um shlándáil faisnéise (ISMS) a chur i bhfeidhm. Dearadh ár ISMS chun sonraí íogaire a chosaint, leanúnachas gnó a chinntiú, agus na rioscaí a bhaineann le cibearbhagairtí a mhaolú. Go bunúsach, cabhraíonn ISO/IEC 27001 lenár n-eagraíocht éirí feasach ar rioscaí agus laigí inár slándáil faisnéise a shainaithint go réamhghníomhach agus aghaidh a thabhairt orthu. Cuireann sé daoine, polasaithe agus teicneolaíocht san áireamh ar mhaithe le cur chuige iomlánaíoch a chur chun cinn, rud a chiallaíonn gur uirlis luachmhar atá ann maidir le bainistiú riosca, cibearsheasmhacht agus sármhaitheas oibríochtúil.

Deimhniú ISO 22301

Mar eintiteas fíor-riachtanach a fheidmíonn laistigh d’éiceachóras digiteach atá an-tábhachtach, tá deimhniú ISO 22301 ag EURid freisin. Léiríonn an deimhniú sin ár dtiomantas maidir le Córas um Bainistiú Leanúnachais Gnó (BCMS) a choinneáil a chinntíonn seasmhacht agus infhaighteacht ár seirbhísí, fiú nuair a tharlaíonn eachtraí suaiteacha.

Ceapadh ár BCMS chun bagairtí ionchasacha ar ár n-oibríochtaí a shainaithint, a dtionchar a mheas agus straitéisí éifeachtacha freagartha agus téarnaimh a bhunú. De bhrí go bhfuil sin á dhéanamh againn, táimid ag cinntiú gur féidir leanúint ar aghaidh le gníomhaíochtaí fíor-riachtanacha gan cur isteach rómhór orthu agus cosaint a thabhairt dár ngeallsealbhóirí, dár gcomhpháirtithe agus do phobal an idirlín i gcoitinne atá ag brath ar ár seirbhísí.

Go bunúsach, cuireann ISO 22301 ar chumas EURid ullmhú go réamhghníomhach do chur isteach oibríochtúil, seasmhacht eagraíochtúil a neartú, agus smaointeoireacht an leanúnachais a leabú inár bpróisis rialachais agus oibríochtúla. Tacaíonn sé le cur chuige struchtúrtha ar fud na heagraíochta i dtaca le leanúnachas gnó, daingníonn sé ár n-iontaofacht, ár sármhaitheas eagraíochtúil agus inbhuanaitheacht fhadtéarmach.

Bearta slándála réamhghníomhacha

Bainimid feidhm as cur chuige ilsrathach i dtaca le cibearshlándáil agus ardteicneolaíochtaí chomh maith le dea-chleachtais á gcomhtháthú againn chun cosaint a thabhairt in aghaidh cibearbhagairí atá ag forbairt. I measc ár mbeart réamhghníomhach tá

• monatóireacht leanúnach: Úsáid a bhaint as uirlisí monatóireachta den scoth chun gníomhaíochtaí amhrasacha a bhrath agus freagairt dóibh i bhfíor-am.

• Freagairt do theagmhas: Plean dea-shainithe um fhreagairt do theagmhas chun aghaidh a thabhairt go tapa ar thionchar na dteagmhas cibearshlándála agus é a mhaolú.

• Iniúchtaí agus measúnuithe rialta: Iniúchtaí slándála rialta agus measúnuithe riosca a dhéanamh chun leochaileachtaí a aithint agus ár gcosaintí a neartú.

• Oiliúint fostaithe: Cláir oiliúna leanúnacha chun a chinntiú go bhfuil an t-eolas ag ár bhfoireann chun cibearbhagairtí a aithint agus chun freagairt go héifeachtach dóibh.

• Leanúnachas gnó agus athshlánú ó thubaiste: Pleananna cuimsitheacha leanúnachais gnó agus athshlánaithe ó thubaiste a chur i bhfeidhm chun cur isteach íosta agus téarnamh tapa a chinntiú i gcás teagmhas cibearshlándála. I measc na bpleananna sin tá cúltacaí sonraí, iomarcaíochtaí córais, agus tástáil rialta lena chinntiú go bhfuilimid réidh do gach teagmhas.

Comhoibriú agus comhar

Comhoibríonn EURid le comhpháirtithe sa tionscal, saineolaithe slándála agus comhlachtaí rialachais chun fanacht chun cinn ar bhagairtí atá ag teacht chun cinn agus nuálaíochtaí sa chibearshlándáil. Mar bhall de bhunaitheoirí ISAC TLD na hEorpa TLD ISAC, rannchuidímid go gníomhach leis an bpríomhardán comhoibríoch seo agus bainimid tairbhe as.

Cuireann an comhoibriú seo ar ár gcumas réitigh cheannródaíocha a ghlacadh agus léargais luachmhara a roinnt chun staid slándála foriomlán an TLD .eu a fheabhsú.

Tiomantas do pháirtithe leasmhara

Síneann ár dtiomantas don chibearsheasmhacht chuig na páirtithe leasmhara go léir, lena n-áirítear cláraitheoirí, cláraithe agus úsáideoirí deiridh. Trí bhonneagar atá slán agus iontaofa a choinneáil, cinntímid muinín agus iontaoibh phobal idirlín na hEorpa.

Ag EURid, ní riachtanas amháin é cibearsheasmhacht; is gné bhunúsach dár misean é TLD .eu a bhainistiú le sármhaitheas agus le hionracas.

DNS Slán

Ag EURid, tugaimid tosaíocht do shlándáil d’ainmneacha fearainn. Áirítear ar ár mbearta slándála cuimsitheacha DNSSEC (Breiseáin Slándála Chóras na nAinmnacha Fearainn), Glas Clárlainne, agus APEWS (Córas um Chosc ar Mhí-úsáid agus Réamhrabhaidh), i measc nithe eile.